FESTA DE NADAL, 22 de decembro de 2016

[Dominio Público], vía PIXABAY

Entre as actividades programadas pola ANPA está o tradicional Festival de Nadal. Este ano 2016, a celebración terá lugar no Auditorio Municipal Gustavo Freire o vindeiro xoves 22 de decembro a partir das 17:00 horas. Actuarán nel o Coro da ANPA, os rapaces e rapazas de Baile Tradicional, Canto e Percusión, Ximnasia Rítmica, Teatro e Iudo. Ao remate das actuacións farán acto de presenza no escenario as Súas Maxestades os Reis Magos de Oriente que, como sempre, virán cargados de agasallos para os nenos e nenas que asistan. Durante toda a tarde desenvolverase no vestíbulo do Auditorio un mercadiño organizado polos nenos e as nenas de 6º de Educación Primaria, que están a recadar fondos para a súa excursión de fin de curso.

Lembrámosvos que tódalas actividades organizadas pola ANPA están cubertas por un Seguro de Responsabilidade Civil e Accidentes e que conviría que as familias non asociadas que participen nelas deberían estar ao día no pagamento da correspondente cota (10€ por rapaz e ano).

Así mesmo, non debemos esquecer que a festa se celebra nun espazo público, nun espazo de todos, e que debemos contribuír co noso esforzo e atención a coidalo e mantelo limpo.

Para organizar a celebración, necesitaremos da vosa contribución a través dun donativo de 3 € por rapaz ou rapaza. Pedímosvos tamén que cumprimentedes o resgardo aquí achegado e llo entreguedes co donativo á mestra ou mestre dos vosos rapaces ata o 9 de decembro. Polas limitacións de espazo do Auditorio necesitamos tamén saber coa maior exactitude posible o número de asistentes. Por iso, establécense dúas quendas para a recollida das invitacións. Na primeira, ata o 16 de decembro, poderedes retirar as dos vosos nenos e nenas máis as dos pais (máximo 2 adultos por familia). Na segunda, entre os días 19 e 21, será posible recoller ata 2 máis por familia ata completar aforo.